حوار بيني وبين التربويين





- نص حوار شباب كلية التربية.

في جروب كلية التربية علي الفيس بوك تم إقتراح عمل مناقشة وحوار مع بعض أعضاء الجروب ضمن توبك "حوار مع نجم من نجوم التربية"



وكان أول حوار في الجروب مع باسم محمود..وحاوره...الصقر الجريء (أكرم)-ولولي (آلاء يحيي) وحمدي أبو سالم ومني القطان وشيماء عمارة وآخرون...
وهكذا كان الحوار....


الصقر الجرى:
عرف بنفسك يا باسم
وقولنا ليه دخلت كلية التربية؟

:Bassem Muhmoud
-حاضر يا أكرم:
دي يا سيدي ورقة تعريفية بسيطة عني:Bassem muhmoud CV
*الاسم/ باسم محمود الجنوبي.
* التخصص/ اللــغـة الإنجــليـزية – شــعـبــة عـامـة.
                                       
Loly Yehya :
ما شاء الله انجازات هايلة منك يا باسم....
يشرفنا ان يكون في الجروب انسان بكل هذا النجاح ...
- ياتري إيه رأيك في الجروب ده...؟
- و ما رأيك في عمل المرأة ؟

Bassem Muhmoud :
-شكرا ليكي يا آلاء......
الجروب رائع...وهو الأن يمثل طلاب كلية التربية علي الفيس بوك؛خليني أقول إني عملت جروب نجوم كلية التربية من قبل ما أعرف الجروب دا؛ وكان نفسي يكون فيه مشاركة من طلاب تربية ؛لكن يبدو إن دفعتي مكنش عندهم وقت أو نت بنفس مقدار الدفعات الحالية ودا إدا نشاط للجروب ده...

الجدير بالذكر إن د.علي شعيب كان معانا في جروب نجوم؛وكان ليه أول كلمات في الجروب ؛أصبحت بعد كدا رسالة الترحيب في جروب نجوم.....إللي بيقول فيها
"كلية التربية منارة الفكر التربيوي في الدلتا....إلخ"
لكن أنا عن نفسي أميل إلي الجروب ده أكثر لئن فيه حيوية ومشاركات ناضجة بتعبر عن فكر واعي وعاطفة حارة خاصة كاي بورد حمدي...ومثابرة آلاء في نقل الأفضل من الشبكة العالمية للجروب ؛؛؛وتذكير شيماء دايما بالأوراد إللي ليها أثر كبير في اختيارات الناس لجروب بيذّكر دايما بالأوراد...

علي أي حال الجروب رائع ...وأنا أنتظر منه أكثر من كده...
:)
- بالنسبة لموضوع عمل المرأة...فأنا ليس عندي مشكلة في عملها إذا كانت هي في حاجة لذلك ومادام بيتها يوافق علي عملها بالصورة التي تحافظ علي استقرار البيت وبضوابط تحافظ عليها وجودها كإمرأة...علي أي حال فقه عمل المرأة ومشاركتها الإجتماعية والسياسية أنا استقيه من كتب الدكتور القرضاوي قراءة ومن خلال مقالات ومناقشات..د.هبة رؤوف عزت-حفظها الله.

:Loly Yehya
- ايه رأيك في نظام التعليم في كليتنا ؟
- هل النظام كفيل بتخريج طالب قادر علي القيام بمهنة التدريس ؟؟
- وما الذي تراه خطأ ظاهر يجب تصحيحه من قبل الدكاتره و القائمين علي عملية التدريس في الكليه ؟
-ايه رأيك في شباب كلية التربيه ؟ هل هو حقا يستحق او قادر علي ان يكون حامل للعلم و التربيه ؟
- هل تري ان المدرسة الان تقوم بدورها التعليمي ؟؟ وما هي مقترحاتك للتطوير ؟؟

Bassem Muhmoud:
نظام التعليم في كليتنا مش بيفرق كتيير عن النظام التعليمي في باقي الكليات المصرية..فمابلك بكلية في المنوفية ...رأيي انتي قراتيه علي المدونة .....

- لكن الخطأ الظاهر جدا...هو عدم احترام الطالب كإنسان...فيه تعالي ظاهر وواضح علي الطالب سواء من قطاع عريض من الأساتذه أو حتي من شؤن الطلبة...ودا كان ليه تداعيات خطيره علي الطالب من أخطرها إن الطالب أصبح مرعوب إنه يطالب بحقه من الدكتور...كأن يطلب من الدكتور توضيح أو إعاده أو الإشارة لمصدر معلومة.....

- وبالتالي تحول الطالب إلي مجرد مستمع وفقط ..والمشاركات الطلابية في الشرح تكاد معدومة...أنا عن نفسي طول الفترة الجامعية لم أري مشاراكات مقننة ومحترمة مسموح بيها إلا من عدد بسيط من الدكاترة يعدوا علي أصابع اليد الواحدة
منهم: د.أحمد سيف و د.حنان الجمال؛وبالتالي كسبوا إحترام وتقدير الطلبه.

                                     د.أحمد سيف (وكيل الكلية لشؤن خدمة المجتمع)

- شباب كلية التربية-الأولاد-زي الفل
أنا ملاحظ إن الغالبية لها صفة سايدة ...بمعني إن في العموم لهم صفات واحده..الأولاد...من أظهرها...الطيبة أو ممكن تسميها الغلب....الإنطواء...القنوع...ودا لأنهم أقلية ...وهي دي سيكولو جية الأقليات..!!!!
- بصراحة طلاب تربية طيبين جدا وبعدهم عن المجمع كان له أثر طيب عليهم...الشباب فاهم طبعا...!!!!!.....
علي أي حال ينطبق عليهم ما ينطبق علي أي جماعة قول الله:
"ليسوا سواء"
فيهم وفيهم..

Hamdy Abu Salem:
ايه اكتر حاجة بيحبها باسم ؟
واكتر حاجة بيتضايق منها باسم؟

Bassem muhmoud:
- السؤال عام أوي يا حمدي.....
والإجابة بالتالي هاتكون عامة...!
أنا يا سيدي بحب الإلتزام...مش بس الإلتزام الديني ,,,لكن الإلتزام في كل شيء...الإلتزام الأخلاقي...الإلتزام العملي..الإلتزام الفكري....إلخ
وأشد ما أكره .....الكوسة ومترادفها....بس أنا  باحب البمية...!
:)

Hamdy Abu Salem:
- أيه الوظيفة اللى نفسك تشتغلها وحاسس انك هتبدع فيها ؟
- لو بقيت وزير للتربية والتعليم هتعمل ايه ؟
- لو بقيت رئيس مصر هتعمل ايه؟
- تفتكر ان فى أمل ولا أمل ماتت ؟
- وتفتكر ان نص الكوباية الفاضى ممكن يتملى ولا هيفضل طول عمره فاضى ؟
- وفى رأيك ايه اكبر مشاكل المجتمع المصرى ؟؟

: Bassem Muhmoud
مع إن الوضع القائم بيحسسنا إن مفيش أمل ولا عمر ؛إلا إني عندي أمل كبيييييييييييير جدا؛بيستند علي شواهد ونماذج وأدلة ومش بس أحلام؛ومع إني نفسي الكوباية دي تنكسر زي ما قلت لك بس بجد فيه أمل في كوباية أو ترمس أفضل منها بكتييييييييييييييير...!

- وحكاية الوزير أو الريس دي مفكرتش فيها...ولا حتي حلمت علشان أفكر في أجندتي الرئاسية....
-الوظيفة إللي نفسي أشتغلها؟؟؟
كل سنة وأنت طيب معدش وظايف
بس كان حلمي من ثانوي إن أكون
مُحاضر علم نفس إجتماعي
ولما قبلت د.حنان الجمال --- شجعتني علي كدا وكانت مثلي الأعلي في ذلك.

- مشاكل المجتمع المصرى ؟؟
علي المستوي العام ....
الفساد يا حمدي أكبر مشاكله...
وألعن من الفساد....السلبية من قطاع كبير من الناس علي الفساد ده!!!!!
لكن أنا شايف إن الوضع بيتغييير

Loly Yehya:
لاحظت انك اتكلمت فقط عن الولاد في كلية التربيه او اخصتهم بالكلام ؛ومجبتش سيرة البنات خالص
كمان فيه سؤال نسيته
- هل تري ان المدرسة الان تقوم بدورها التعليمي ؟؟ وما هي مقترحاتك للتطوير ؟؟

ما هي اكثر العيوب التي تراها في شباب اليومين دول ؟ بنات وولاد يعني
بالتفصييييييييل

Bassem Muhmoud:

ودا لئني لم اختلط بالبنات كتيييييييير...مع إني كنت في اسرة مختلطة ومع إني كان ليا علاقات وثيقة باتحاد الطلبة وكنت من مؤسسي دكان الإتحاد!!!!!
ولكن دايما كان فيه ضوابط...بس خليني أقول
إن البنات في تربية فيهم بنات أنا باستغرب إزاي جم تربية!!
ودا ليه وجهين:
- الأول
إن فيه نوع كان يتصور الواحد إنهم مكانهم الأفضل كلية دعوية شرعيه؛وفيه بنات مكنهم الأفضل إعلام....وكدا
- التاني
فيه بنات مكنهم الأفضل غرفة مغمورة في بيتهم علشان ميجيبوش العيب والكلام علي أهلها....
لكن في المجمل :
بنات تربية أفضل بكتييييير من بنات كتييييير في المجمع...علي الأقل البنت بتحس في تربية إنها في كلية بنات وبتكون مطمنة علي نفسها..وإن كان ده ليه تداعيات علينا كأولاد...يعني فيه سطوة بناتية علي الكلية....!!


- بالنسبة لسؤال المدرسة دا انا إنسألته من د.محمود فوزي-شفاه الله وعفاه-في امتحان التربية العلمي السنة إللي فاتت وكانت إجابتي عليه:
"إن المدرسة الأن غير مأهلة لإخراج طالب مأهل معرفيا أو علميا أو عمليا لأسباب معلومة سياسيا وإقتصاديا؛لكن المدرس صاحب الضمير يستطيع بموارد قليلة وضعيفة تجويد عمله وإخراج طالب يستطيع أن يحقق ذاته ويكمل الطريق لوحده..."
ومع إن دا قليل وجوده في المدارس بس موجود.
مقترحاتي للتطوير:

- تأهيل المعلمين علميا وعمليا بصورة أفضل من الحالية.
- القضاء عل التسيب والإشراف الكامل والمراقبة الصارمة علي كليات الإعداد-التربية يعني.
- إن وزارة التربية والتعليم يكون وزيرها والمسؤال عنها شخص معروف في الوسط التربوي بعلمه وإنتاجه التربوي..مش بس علشان كان رئيس جامعه......وبكدا هايوفر علي الشعب التفكير في الإصلاح التعليمي لإنه هو عارف أهمية وضرورة الإصلاح التعليمي وهاينفذه من غير إلحاح.
-الإصلاح التعليمي لا ينفصل أبدا عن الإصلاح السياسي ولا يكون تعليم بلا حرية سياسية...مش عايز أفصل ...!
- وأكتر عيب في الشباب-أولاد وبنات-
الـــــــــــــــــســـــــــــــــلـــــبـــــيــــــة
باعتقد إن العيب دا هو إللي جايبنا لورا...بس لما باشوف شباب إيجابي...مع ندرته إلا إني
بجد باحس بأمل.....
وأنا لسه واخد جرعة أمل كبيرة جدا الأسبوع إللي فات....
شفت مجموعة من بنات وأولاد المنوفية -في جمعية صناع الحياة-عندهم فكر رائع وهمة عالية قاموا بأعمال إغاثية وتعليمية وعلاجية لا تقوم بها مؤسسة حكومية في المحافظة الأن.

Hamdy:
مين مثلك الاعلى ؟ وليه ؟

:Bassem Muhmoud
مثلي الأعلي هو إمام الإصلاح في مصر الأن ...أستاذي :

الأمين العام للإتحاد العالمي لعلماء السلمين

ودا لإنه ببساطة حد وظف شغله لخدمة أمته ودينه وكرس حياته كلها للموضوع ده ؛؛ومش بس هو حد عالم وفاضل ومحترم ....دا كمان بيحرص إن يخرج جيل له نفس فكره وأجندته الإصلاحية.... وتشرفت بأن كنت ممن يجلس أمامه ويتعلم منه مشافهة وحضورا ومشاركة.
لكن فيه ناس باتعلم منهم إلي الأن كل واحد باتعلم منه أفضل ما فيه وأنت عارفهم زي الأساتذه والعلماء إللي عرفتهم
ومن أهمهم؛إللي انتوا قرأتم عنهم في المدونة...تحت عنوان
Loly Yehya:
أنت عندك حق في حكاية سطوة البنات علي الكليه بس ده لان الولاد بيفكروا يدخلوا اي كليه تانيه غير تربيه ممكن يفضلوا تجاره او اداب عن تربيه و لو بصينا لكلية تجارة مثلا هنلاقي نسبة الولاد فيهم عاليه جداااااا
وطبعا لان معظم الولاد بيقولوا لا انا مطلعش اشتغل مدرس.....
لكن البنات شايفين إن مهنة التدريس هي انسب مهنة ليهم وانا بعتبرها افضل مهنة للبنات علي الاطلاق .
- س:لو قعد جنبك حد في المواصلات بيدخن وطبعا انت مستاء من رائحة الدخان هل هتنصحه ولا هتقول وانا مالي ؟
- ولو اتكلمت معاه هيكون الحوار ايه بينكم ؟
- الداعية مصطفي حسني بيعمل برنامج ديني اسمه خدعوك فقالوا
- لو افترضنا انك بتعمل نفس البرنامج بس دنيوي في امور دنيويه
- هتقول خدعوك فقالوا ...................... ايه ؟؟

:Bassem Muhmoud
:)
يمكن يكون عندك حق في حكاية السلطوية البناتية دي ... ويمكن يكون من أهم أسبابها علي رأيك صعوبة التواصل والوقوع بين الإفراط والتفريط فيه
!!!!!....


إذن نلتمس لبعض الأعذار...وانتي يا آلاء  وشيماء ...ماشاء الله عليكم ...شغلكم زي الفل...
-بالنسبة لسؤالك يا آلاء.....فأنا تقريبا باتعرض للشيء ده؛؛؛؛وبيكون رد فعلي كالتالي:
ابتسامة خفيفة..أضع يدي علي صدري....قائلا...والله لو سمحت يا أستاذ السيجارة....
برد فعل أوتماتيكي يلقي السيجارة ولو كانت في أولها مع الإعتذار منه ؛قلما أن يكون خلاف ذلك مني أو من الشخص المدخن....والحمد لله.

- الداعية مصطفي حسني بيعمل برنامج ديني اسمه خدعوك فقالوا.....
لو افترضنا اني  باعمل نفس البرنامج بس دنيوي في امور دنيويه ...
هأقول خدعوك فقالوا ...................... ايه ؟؟
طبعا هاتكلم علي حالة التردي والثقافي والتخلف إللي كتييير من الشباب نايمين فيها
لدرجة إن كتييييير منهم مش بيفرق بين
الشيوعي والشيعي....!
وبين الصوفية والماسونية....!!
لدرجة إن فيه ولد في رابعة جامعة سأل الشيخ الحويني...
هو النبي كان شافعي ولا حنفي؟ !!!
علي أي حال....
              هاتكلم في الموضوعات إللي عنواينها :
- خدعوك فقالوا ...... الجهل نعمة!
- خدعوك فقالوا.....كبر دماغك ونفض!
- خدعوك فقالوا ....نم وارتاح يأتيك النجاح!
- خدعوك فقالوا ..... إللي نعرفه أحسن من إللي متعرفوش!
- خدعوك فقالوا ..... لو نزلت في بلد بيعبدوا العجل حش وأكله!
- خدعوك فقالوا .... مفيش فايده!
- خدعوك فقالوا ..... من أجلك أنت!
- خدعوك فقالوا ..... بص لنص الكوباية المليان!
:)
الصقر الجرى :
ما شاء الله عليك ياباسم ....
انا سعيد جداااااااااااااا ان انت ضمن قائمة اصدقائى وان انت معانا فى كليتنا
ماشاء الله عليك

:Bassem Muhmoud
وأنا أسعد بيك يا قلبي؛؛؛تسلم يا أكرم.

:Mona Al Kattan
اولا ماشاء الله عليكم كلكم
الاسئله جميله جدااااا
والاجابه اجمل....
:Mona Al Kattan
انت قولت....إن وزارة التربية والتعليم يكون وزيرها والمسؤال عنها شخص معروف في الوسط التربوي بعلمه وإنتاجه التربوي..مش بس علشان كان رئيس جامعه.....
سؤالي ايه رايك ف وزير التربيه والتعليم د احمد ذكي بدر؟؟؟
وهل رائك متعلق بالجمله دي و لا؟
:Bassem Muhmoud
بالظبط أنا أقصد ما فهمتي يا مني ؛؛؛وإلا ففيه في مصر علماء تربويين من الطراز الأول ...وكتبهم مراجع لكل الرسائل التربوية ...للعلم أنا مهتم جدا بإني أشوف مراجع الكتب؛؛عمري في حياتي ماشفت إسم د.أحمدزكي في أي كتاب؛بس شفت اسمه في حجات تانيه

:Loly Yehya
- أحب أزود علي حلقاتك...خدعوك فقالوا...إللي تخاف منه ميجيش أحسن منه...!
:)
- ما هي البرامج التلفزيونيه التي تحب مشاهدتها وتدوام عليها ؟
واذا اردت ان تسمع رأي في الدين الي من تستمع ؟ ولماذا ؟
ايه رأيك في شيخ الازهر الجديد ؟
هل تري ان شيخ الازهر السابق رحمه الله كان قائما بدوره ام انه كان مجرد صاحب منصب ؟
لو قالولك هنعمل وزاره جديده في البلد تفتكر مصر محتاجه وزارة ايه ؟؟


:Bassem Muhmoud
خدعوك فقالوا ........ اللي تخاف منه ميجيش احسن منه
هاتبقي حلقة طويله جداااااااااااااااا

البرامج يا سيدتي:
كما هي مكتوبة في جدول البرامج التي أتابعها وأسجلها علي الجهاز مباشرة ...
-أكاديمية إعداد القادة...طارق السويدان...قناة الرسالة
- النفس والحياة...برنامج علم نفس-..د.طرق الحبيب...قناة الرسالة

-علمتني الحياة....د.طارق السويدان...قناة الرسالة
- بلا حدود..أحمد منصور....الجزيرة
- مع هيكل...الأستاذ محمد حسين هيكل...الجزيرة

-الإتجاه المعاكس....د.فيصل...الجزيرة
- 90- دقيقة...معتز...المحور
-العاشرة مساءا....مني الشاذلي....دريم الثانية

- الحقيقة...الإبراشي.....دريم الثانية
-الشريعة والحياة ...د.القرضاوي....الجزيرة
- الرد الجميل...د.محمد عمارة...إقرأ

*  إذا أردت أن أعرف لرأي الدين في شيء أستمع إلي مجموعة من المشايخ والعلماء..وما يجمع عليه أكثرهم آخذ به.....
بس لا يكن الأمر بهذا الإطلاق ..علي حسب الموضوع أو الشيء إللي أنا عايز أسأل عنه
بمعني:
-لو عايز أسأل في قضية معاصرة وأعرف عنها يكون الدكتور القرضاوي.
- لو مسألة سياسية يكون د.محمد سليم العوا
- لو مسألة ثقافية يكون د.محمد عمارة
- لو عايز أسأل في صحة حديث معين
أسأل واسمع الشيخ الحويني-حفظه الله
وهكذا.......يعني أشوف المتميز في موضوع المسألة واسأله
...والحمد لله أنا باعتبر نفسي محظوظ لئني عرفت علماء وأساتذه من طراز عالي...ودا من فضل الله عليا أنا وشباب علماء المستقبل..وللعلم معايا ثلاثة من تربية...وحوالي سبعة من جامعة المنوفية
المنايفة في كل مكان
!!!!!!!
شيخ الأزهر السابق-رحمه الله وغفر له-لا أريد أن أعلق علي معاونته لفرنسا في منع الحجاب ولا إباحته أخذ الفوائد البنكية ولا إباحته لإعتقال أفراد المعارضة المصرية...علي أي حال الراجل بين يد الله...ربنا يرحمه

* أما شيخ عن الأزهر الجديد::
فالكلام في الموضوع ده سابق لآوانه لئن الراجل لسه بيقول يا هادي...وعلي أي حال الراجل إعترف بسوء حالة الأزهر وتدهور مكانته إسلاميا نتيجة ضغط السياسة علي كرسي المشيخة؛؛؛والإعتراف بمشكلة بيكون أول الطريق لحلها
وبرغم ماضي د.الطيب ...لكن أنا متفائل به جدا... يعني أكيد مش هايقع في اللي وقع فيه غيره...علي أي حال أن أدعو له أن يكون أفضل..لئن الأزهر مكانته عاليه جدا ومن مصلحة مصر وكل مصري إن يكون الأزهر في السماااااااااااااااا
يارب....

** الوزارة الجديدة:
طيب يعني هي ناقصة وزارات...!
بس نفعل الوزارات الموجوده,,هاتبقي الحياة زي الفل.....
يعني حضرتك عندك وزارة اسمها وزارة الثقافة...نفسي أعرف هي شغاله إزاي وبتعمل إيه ؟؟؟؟؟
لما تشوفي دكتور في الجامعة بيغلط في أشهر آيات القرآن...!
مرة دكتور عندنا قال في محاضرة
يا نوح اهبط بسلم
(هي - بسلام)
.....فإذا دا كان في قطاع الدكاترة ؛؛؛فما بالك بالطلبه
عودا للوزارة:
أنا نفسي في وزارة اسمها وزارة الضحك
أيوه يكون فيه كدا وزارة شغلتها فرفشة الناس وتخترع نكت؛؛؛بدل الناس ماهي ماشية مبلمة كدا؛؛يكون شغلتها مسح النكد إللي الناس شيفينه في الشغل والكليات والمؤسسات الحكومية؛؛خاصة بعدما قلت النكت في الشعب المصري إللي كان فيوم من الأيام بيصدر نكت للخارج
:)

loly Yahia:
الشعب المصري مش محتاج حد يصنعله نكت هو قايم بالواجب ومش مقصر بصراحة :D
كنت بفكر في وزارة للناس الغلابه ... اي حد عنده طلب الوزاره تنفذهاله فورا :D:D
- هل جربت قبل ان تتبرع بالدم لحد ؟
- لو اه كان ايه شعورك وقتها ؟
- وهل لو شوفت عربيات التبرع بالدم زي اللي بتكون واقفه قدام الكليه كده ممكن تتبرع بالدم ؟
بما انك قسم انجليزي:
- تنصح طلبة انجليزي بكتب زي ايه في الجرامر و خلافه ؟
- وما هي المواصفات التي يجب ان تتوفر في المدرس الناجح ؟

:Bassem Muhmoud
الشعب المصري مش محتاج حد يصنعله نكت هو قايم بالواجب ومش مقصر بصراحة
!!!!!!!!!!!
ممممممممم
دا كان زماااان..لأ... فيه تراجع واضح في إنتاج النكت...ودا رصد من د.عاكشة-أستاذ الصحة النفسية- ومن أ.عادل حمودة في كتابه كيف يسخر المصريون...واثبتوا إن فيه فعلا تراجع ودا شيء غير مبشر....
دا حتي سوبر هنيدي حس بالفرق.

وعلي فكره إحنا عندنا الوزارة إللي نفسك فيه دي-بس باسم تاني- التضامن الإجتماعي-بس مش بتعمل كدا خالص زي ما بتقولي يا آلاء
من خمس سنوات وأنا بيحصل معايا شيء غريب -كل ستة شهور تقريبا بتحصل حاله عند حد زميل أو صديق أو قريب محتاج نقل دم؛والعجيب إنهم عايزين نفس الفصيلة إللي عندي
B-
لدرجة إني فكرت أغير الفصيلة
!!!!!!
علي اي حال أنا بحس إني طاير في السما بعد التبرع -الواجب ده-مش بس علشان تغيير الدورة الدموية ودا بيدي حيوية للجسم ومفيد للجسم؛كمان علشان الواحد بيحس إنه ساعد في استمرار حياة إنسان وإن دمه بيجري في عروق أخوه إللي كان ممكن يودع -شعور بأداء الواجب ...يعني..

بس لا أفضل التبرع في العربيات إللي بنشوفها عند الكليات والمجمعات وفي معرض الكتاب وكدا...ودا لئن ممكن يكون معندهمش حالات مستعجلة -وبس عايزين فائض ومخزون ...فأولي بدمي حد محتاجه.....
بس لو حسيت إني قعدت فترة كبيرة جدا من غير ما اتبرع ...بسلم نفسي لأول عربية في طريقي.

بالنسبة لتحسين مستوانا في الإنجليزية؛أنا أري إن كتب القواعد والصوتيات وخلافه إحنا بناخده في الكلية سد خانه؛لكن أنا شايف إللي عايز يحسن نفسه في اللغة يسمع ويتكلم في المجال إللي بيحبه.
لكن خليني أقول إني باستمتع بقراءة ترجمة القرآن ...طبعة الملك فهد....رائعه...ثروة لغوية ولا أروع.....
كمان سماع القنوات الإخبارية الطبعات الإنجليزية :
زي
الجزيرة
BBC
كمان قناة زي
Huda TV
رائعة
علي الأقل بتعلم الواحد إنه يتكلم عن دينه بلغة تانية؛وبتدي دافعية للواحد إنه يعرف مصطلحات ويدور علي المعني ويظبط النطق؛واللغة ماهي إلا حفظ كلمات زي ما بيقول سابستيان-ودا شاب ألماني بيتقن35لغة حية؛وحياته كلها في حفظ الكلمات ومقارنتها بأمثلها في اللغات التانيةوهو دا الطريق......

- وبالنسبة لسؤالك عن المدرس الجيد والمعلم الناجح.....
والله أنا شايف إن انتم أساتذه وناجحين
وتعرفوا كويسه إجابات وافية لسؤال زي ده
لكن خليني أضيف بجانب إللي تعرفيه يا آلاء
من ضرورة إجادة التخصص؛ومرونته مع الطلبه :

أضيف إن لازم يكون للمدرس رسالة
رسالة نهضوية؛رسالة أخلاقيه؛رسالة سياسية؛رسالة علمية
يعني مش بس يقف علي حدود الكلام إللي ناقله من النت أو من الكتب في المذكره إللي بيدرسها لطلابه!!!
وأنا شفت مدرسيين سواء في المدسة أو الجامعه علي المستوي ده
وأنا قلت وأقول ..إن
د.عبد الوهاب المسيري-رحمه الله.

توفي من سنتين -كان أستاذ للأدب الإنجليزي في جامعة عين شمس-كان مثال ولا أروع للمدرس صاحب الرسالة ...
كان بيستخدم تخصصه وعمله وحياته لأداء رسالته؛وكان بيخلي الطلبه يعملوا حفالات وندوات ثقافية في أماكن مفتوحه في البلد وكان بينظمها معاهم وكان بيته ملتقي للطلاب وكان بيخرج معاهم رحلات .....
هو ده الأستاذ الناجح؛إللي بيحوز علي تقدير المجتمع بلانفاق في حياته وبعد ميت سنة بعد وفاته
ربنا يرحمه....

عودا للأستاذ الجيد صاحب الرسالة عايز أضيف إن

في نطاق جامعة المنوفية شفت حاجه زي كدا في تواضع وخفظ الجناح للطلبه في أمثال:


أ.د/عيد شبايك
**عميد الأداب2008**
                                       د.عيد شبايك-رئيس قسم اللغة العربية -بالأداب


د.رضوان السبكي
**أستاذ الأدب الإنجليزي في آداب**

د.عطية شعبان
*أستاذ أصول التربية بالكلية.
                                                          د.عطية شعبان-رائد الإتحاد

د.حنان الجمال
*أستاذ علم النفس الإجتماعي.
د.مفرح سعفان
**أستاذ البلاغة بكلية الأداب.

                                                                  د.مفرح سعفان
د.محمود فوزي
**أستاذ أصول تربية.
د.أحمد سيف
**أستاذ طرق التدريس للغة الإنجليزية.

د.مصطفي شاهين
**أستاذ فلسفة سياسية في آداب

                                                                    د.ســــامي أبوبيه
 * د.سامي محمود أبو بيه.
-رئيس قسم علم النفس وعميد التربية الأسبق..ومرشح رئاسة الجامعة لكذا فترة.
د.محمد عبد العزيز
**أستاذ دراسات إسلامية في أداب
د.عبد المنعم حبيب.
*أستاذ الأدب الإنجليزي.               
- وإلي الأن أتبادل مع هؤلاء الرسائل وأزور بعضهم أحيانا***
التواضع مع إنه صفة جميلة بس بتكون أجمل في المدرس والأستاذ وبالتالي بتجمله !
Loly Yehya:
هل للكوسة دور في حياة باسم ؟
يعني اتظلمت بسبب الكوسه قبل كده ؟
لو اه كان ايه رد فعلك ؟
ومن وجهة نظرك ازاي نحارب الكوسه دي ؟
لو وجهت نصيحه للشباب هتقولهم ايه ؟
ولو وجهت نصيحه للبنات هتقولهم ايه ؟
خصوصا شباب وبنات كلية التربية
لو لم ادخل كلية التربية لدخلت ........... اكمل؟

Bassem Muhmoud:
الكووووووووسة
هاتقلبي عليا المواجع.....
الكوسة ياسيدتي ذوقتها رغم أنفي كتييييييير
ومع كل مرة كان لي رد فعل مرة تصيب ومرة تدوش....
ومن المرات إللي صابت تقديرات في بعض المواد رجعت لي بعد ظلم شديد مع إن المتصور من الزملا إن دا مستحيل....ودا حصل كتيييير
ومن المرات إللي دوشت الإستبعادات الكتيرة من فاعليات ثقافية في الجامعة ؛؛محاصرة أسرة الشهاب في كلية التربية مع إن رائدها الدكتور سامي أبوبيه عميد الكلية الأسبق؛ودا كان من جهات غير معلومة .....
إلي الأن
!!!!!
وفيه حاجه كمااااان محمد ساير-أمين إتحاد الطلبه- عرفها كويس...
كانت فيها كوسة من العيار التقيييييييييل
بس مش عايزافتكرها لئني بحزن بجد
والحمد لله أخدت حقي بشكل تاني......
- وعلي ذكر الكوسة
كان معانا بنت شاعرة ساخرة اسمها أسماء...
نزلت أبيات جميلة كانت نقلها في مجلة الإتحاد-الفجر الجديد
قالت فيها أبيات جميلة جدا بتعبر عن الكوسة إللي أنا شفتها
قالت يا سيدتي::

للكوسه في بلادي شئون
بتخلي المسنود فرعون
يتفرعن فين مهما يكون
وتخلي الجاهل أستاذ
والأعرج لاعب جمباز

إذا كنت بتعرف دكتور
حتعيش متطمن مسرور
وحتسلك ف لجان الشفوي
ومجال تعيينك موفور
وحتطلع فالتليفزيون
بالبدله وفيها الببيون
تتكلم وبكل بساطه
عن شرف المهنه المدفون

لكن لو شاعر غلبان
قلت اللي ف نفسك علطول
حيقولو مين قال لك قول
ويهاجمك مليون إنسان
وعجبي
!!
- بس علي فكره فيه ناس بتحبها جدا وطعمها حلو جدا عندها للأسف---هنا أقصد الكوسة الملعونة في القرآن-المحسوبيه--
ومحاربتها واجب وفرض ولازم وحتما وضروري إذا كنا عايزين مصلحة مصر ومصلحنا الخاصة حتي...
الطريق:::إننا منسكتش علي الكوسة....


-  السلبية بتخليها تنتشر وتستمر وتستمر وتنتشر وتزيد....علي فين؟؟
إلي الهاوية يا سادة...!!!!
كل علي قدر طاقته بس -منسكتش
الساكت عن الحق شيطان وأخرص
إعمل أي حاجه ممكن تغير بيها
ودا من باب إنكار المنكر- من رأي منكم منكرا فليغيره......بيده-بسانه-بقلبه(ومينفعش غير كدا وإلا) وليس وراء ذلك من الإيمان حبة خردل......زي ماقال الرسول-عليه الصلاة والسلام.
ودا حل فوري..ونتائجه الله أعلم بيها
بس علينا العمل وعلي الله النتائج والأجر

لكن فيه حل جذري للكوسة وكل مترادفات الفساد في مجتمعنا

بيتلخص في:

* إصلاح النفس.....ومحاولة إصلاح الغير
بمعني إن الواحد يخاف ربنا ويراعي ضميره ؛؛وكمان يحاول يكون عنده هم بالغير؛لما يشوف وضع غير طبيعي من حد يحاول يغيره
وبكدا هانكون خير أمة
*كنتم خير أمة أخرجت للناس؛تأمرون بالمعروف وتنهون عن المنكر وتؤمنون بالله-الأية
وهنا ممكن أوصي نفسي الأول وكل الشباب إللي بيقرؤا كلماتي بـ
"أصلح نفسك وادعو غيرك؛"
- ونصيحتي لنفسي وإخواني الشباب-الأولاد
"دير بالك علي حالك"
ودي كلمة سعودية معناها
اشغل نفسك بحالك وشغلك أنت... وحقق نفسك ...ومضيعش وقت في التوافه ...فوقتك هو حياتك... مضيعهاش يعني...

ونصيحتي لأخواتي -البنات-لا تنفصل البنات بالطبع عن كل ماسبق-فهي شريكة مجتمع وواجبات وحقوق-لكن أضيف-
حفظي علي نفسك بأخلاقك وقيمك ودينك؛؛أنتي كدا في الأمااان في الدنيا والأخرة؛؛واستمتعي بحياتك من غير ما تغضبي ربك
:)

- نصيحة لبنات تربية
؟؟؟؟؟؟؟؟؟؟؟
اتقوا الله في الأقلياااااااااااااااااااااات..
:)
- لو لم ادخل كلية التربية لدخلت ........... اكمل ؟
ممممممممممممممم
طيب ما أنا دخلت تربية وخلاص...!
ما علينا:
لو لم ادخل كلية التربية لدخلت ...........
لدخلت أي كلية تانية.....
وحولت منها...
ودخلت تربية..!
:)
مع إني في الثانوي كنت عايز أدخل ألسن؛؛؛بس عرفت بعدين إني مكاني الأفضل هو تربية....
Shimaa Emara:
بجد انا مبهوره بالكلام الجاااااااااااامد ده . ....
حوار رائع . ...
بعد كل الكلام والاجابات النموذجيه دى مش عارفه اضيف حاجه . بجد ما شاء الله عليك يا استاذ باسم . ربنا يزيدك ويبارك فيك . وبجد لازم تزورنا فى الجمعيه وقريبا جدا عشان نستفاد من الكلام ده

:Bassem Muhmoud
شكرا يا شيماء...
نحن لا نري الأشياء كما هي ؛؛؛نراها كما نحن
شكرا ليكي
وإن شاء الله أول دعوة في أول فاعليه هاكون معاكم
:)
-اعتقد إن دا اليوم التالت والأخير؛؛؛؛ومع ضيف جديد بكره إن شاء الله؛؛وبكدا بنتهي حلقتنا الليلة سادتي آنساتي
:)
علي فكرة استمتعت جدا بالحديث الرائع ده معاكم يا شباب
والأسئلة إللي كان فيها فكر ورسالة دي
ربنا يوفقكم ويبارك فيكم وفي جهدكم :)

تعليقات فيسبوك
0 تعليقات بلوجر

يشرفنا تعليقكم..مشكورين علي ما كتبتم محول الأكواد محول الأكواد الإبتسامات الإبتسامات